Regjistrimi i parë i një truri njerëzor para vdekjes, zbulohet se çfarë ndodh

Çfarë ndodh me trurin ndërsa kalojmë nga jeta në vdekje ka qenë një mister për shekuj me radhë. Një ekip neuroshkencëtarësh ka kapur aktivitetin e trurit të një individi që po vdes, duke sugjeruar se truri mund të luajë një kujtim të fundit të ngjarjeve të rëndësishme të jetës, një fenomen që është shpesh i lidhur me përvojat afër vdekjes.

Ky zbulim u bë kur një paciente 87-vjeçare, që po trajtohej për epilepsi, ishte lidhur me një test EEG, i cili lejoi ekspertët të regjistronin valët e trurit të pacientit 15 minuta pasi humbi jetën nga një atak në zemër.

Mjekët kishin lidhur një pajisje në kokën e saj për të monitoruar aktivitetin e trurit, dhe edhe pse ajo vdiq gjatë procesit, shkencëtarët regjistruan 900 sekonda aktivitet truri përpara dhe pas ndalimit të zemrës.

Rezultatet sugjeruan se zonat e trurit të lidhura me kujtesën dhe rikthimin ishin ende aktive, duke ofruar një mundësi të re për të kuptuar përvojat e individëve që kalojnë përvoja afër vdekjes.

Duke parë valët e trurit, studiuesit vunë re një rritje të ‘lëkundjeve gama’. Këto kontrollojnë lidhjen midis rajoneve të ndryshme të trurit, duke i bërë ato vendimtare për perceptimin, lëvizjen, kujtesën dhe emocionet.

“Këto gjetje sfidojnë të kuptuarit tonë se kur saktësisht përfundon jeta dhe gjenerojnë pyetje të rëndësishme të mëvonshme, të tilla si ato që lidhen me kohën e dhurimit të organeve.”

Ndërsa ndryshime të ngjashme në valët e trurit janë monitoruar më parë te minjtë, studimi i publikuar në revistën Frontiers in Aging Neuroscience shënoi herën e parë te njerëzit.

Megjithatë, si me shumicën e studimeve, ekipi e bëri të qartë se do të nevojiteshin kërkime të mëtejshme për të  arritur në pretendime përfundimtare.

Ekipi vuri në dukje se të dhënat e përdorura për të arritur në përfundimin e tyre përqendroheshin vetëm në një rast të vetëm studimi dhe se truri i pacientit ishte dëmtuar tashmë nga epilepsia.

Prandaj, ata nuk ishin në gjendje të përcaktonin nëse e njëjta gjë do të ndodhte patjetër me një person tjetër afër kohës së vdekjes së tyre.

Dr. Zemmar shtoi: “Diçka që mund të mësojmë nga ky hulumtim është: megjithëse të dashurit tanë i kanë sytë mbyllur dhe janë gati të na lënë , truri i tyre mund të jetë duke rishfaqur disa nga momentet më të bukura që kanë përjetuar në jetën e tyre.”