Konsumatorët që e kanë këtë produkt duhet të ndërpresin menjëherë përdorimin

Ascent Consumer Products Inc. me bazë në Nju Jork po tërheq nga tregu ilaçet e larjes së hundës, SinuCleanse Soft Tip Squeeze Bottle. Testet laboratorike konfirmuan se përmbajnë bakterin stafilokoku aureus, i cili mund të shkaktojë një sërë komplikimesh shëndetësore. Në shumicën e rasteve, këto baktere nuk shkaktojnë probleme, ose shkaktojnë infeksione relativisht të vogla të lëkurës.

Por stafilokoku mund të çojë në një infeksion më serioz të quajtur MRSA, me bakteret – që janë bërë rezistente ndaj shumë antibiotikëve – që hyjnë në qarkullimin e gjakut, nyjeve, kockave, mushkërive ose zemrës dhe madje edhe në tru.

Për shkak të mënyrës se si përdoren spraj për hundë, ekziston rreziku që infeksioni të përhapet në tru. Njerëzit në rrezik më të lartë janë të moshuarit, njerëzit me plagë të hapura ose sistem imunitar të dobët dhe fëmijët shumë të vegjël.

Është vlerësuar se më shumë se 2 milionë njerëz në SHBA kanë një infeksion që është rezistent ndaj një antibiotiku, duke çuar në mbi 20,000 vdekje. Ascent Consumer Products Inc thotë se përdorimi i sprajit të saj nazal mund të çojë në infeksione të gjakut.

Ai paralajmëron: ‘Mund të ndodhin infeksione dytësore, të tilla si endokarditi, infeksionet e kockave dhe nyjeve, absceset e shpretkës. Sinusiti bakterial  mund të çojë në infeksione të indeve të syrit, probleme të shikimit, dëmtim të nervit kranial ose meningjit”.

“Këto infeksione janë serioze dhe potencialisht kërcënuese për jetën.”

Produkti i tërhequr përmban numrin e lotit 024122661A1 dhe datën e skadencës 31-12-2027.  Ascent Consumer Products Inc. po njofton shpërndarësit dhe klientët e saj me email.

Ndërkohë, shpërndarësit dhe shitësit me pakicë në zotërim të lotit janë udhëzuar që të ndërpresin menjëherë shpërndarjen dhe ta heqin atë nga inventari.

Konsumatorët që e kanë këtë produkt duhet të ndërpresin menjëherë përdorimin dhe ta kthejnë në vendin e blerjes ose ta hedhin./Dailymail