Agrometerologët informojnë se reshjet e dëborës që përfshinë vendin javën e kaluar kanë një ndikim shumë pozitiv për bujqësinë dhe se ato do të rrisin nivelin e lagështisë në tokë, duke ndihmuar jo vetëm shtresën e sipërme të saj, por edhe ato më të thella, çka është shumë e rëndësishme për zhvillimin e kulturave bujqësore
Anëmsha SHABANI
Shkup, 23 janar – Në këtë periudhë, kur moti bëhet i ftohtë dhe reshjet e dëborës bëhen të shpeshta, bujqësia mund të përfitojë shumë nga këto kushte. Sidoqoftë, ndikimi i këtyre kushteve meteorologjike nuk është gjithmonë negativ, por përkundrazi, ato mund të sjellin përfitime të mëdha për kulturat bujqësore. Një nga elementët kryesorë që ndihmon në zhvillimin e bimëve është dëbora, e cila, përveç se krijon një mbulim natyror mbi tokë, ka edhe disa veti të tjera që janë thelbësore për mbjelljet e dimrit dhe vjeshtës. Agrometerologët informojnë se reshjet e dëborës që përfshinë vendin javën e kaluar kanë një ndikim shumë pozitiv për bujqësinë dhe se ato do të rrisin nivelin e lagështisë në tokë, duke ndihmuar jo vetëm shtresën e sipërme të saj, por edhe ato më të thella, çka është shumë e rëndësishme për zhvillimin e kulturave bujqësore.
“Një element i veçantë që sjell dëbora është funksioni i saj si izolator termik. Kjo është veçanërisht e rëndësishme për mbjelljet e vjeshtës, të cilat janë më të ndjeshme ndaj temperaturave të ulëta. Ndryshimi i motit i shoqëruar me reshje dëbore dhe formimin e një shtrese dëbore mbi tokë është vlerësohet pozitivisht, pasi këto kushte janë të nevojshme për mbjelljet e këtij sezoni, që kërkojnë mbrojtje nga të ftohtët dhe më shumë lagështi në tokë. Shtresa e dëborës ndihmon që lagështia të ruhet dhe të depërtojë më thellë në tokë, duke pasur një ndikim të dobishëm për të gjitha kulturat bujqësore”, theksojnë agrometerologët nga Drejtoria e Punëve Hidrometeorologjike (DPH).
Nga atje gjithashtu shtojnë se dëbora ka një rol shumë të rëndësishëm në mbajtjen e një temperature konstante në tokë, duke i mbrojtur mbjelljet nga temperaturat ekstreme si dhe duke siguruar një ngrohje të butë të shtresave të tokës, që është e nevojshme për zhvillimin e farave dhe mbjelljeve të tjera. Sipas tyre, dëbora ruan temperaturën e tokës në rreth një gradë Celsius në thellësinë prej pesë centimetra, duke mbajtur një ambient të përshtatshëm për zhvillimin e farave dhe rritjen e kulturave.
“Për të siguruar që mbjelljet të zhvillohen siç duhet, ne rekomandojmë që fermerët të vazhdojnë të kujdesen për to, veçanërisht nëse kushtet e tokës e lejojnë këtë. Gjithashtu, fermerët të vazhdojnë përpjekjet për forcimin e strukturave si serat dhe strehimet e tjera për të mbrojtur mbjelljet nga kushtet ekstreme të motit, si dhe të realizojnë aktivitetet e nevojshme bujqësore, siç janë puna e tokës dhe aplikimi i masave të duhura agroteknike”, thonë nga DPH. Ndër të tjera, siç theksoi DPH-ja, kjo periudhë është shumë e rëndësishme për zhvillimin e bujqësisë, dhe angazhimi i vazhdueshëm i fermerëve është kyç për arritjen e rendimenteve të mira dhe për sigurinë e prodhimeve bujqësore, prandaj, fermerët duhet të mbeten të angazhuar dhe të kujdesen për mbjelljet, duke përdorur çdo mundësi që ofrohet nga natyra për të siguruar kushte optimale për rritjen e kulturave. (koha.mk)